A day without laughter is a day wasted - Charlie Chaplin

_______________________________________________________________________________________

තාරකා හොරා


පලස්තීන ජනාධිපති මහමුද් අබ්බාස් දුන් තාරකා සම්මානය ද රැගෙන මහින්ද රාජපක්ෂ හැරෙන තැපෑලෙන් ගියේ පලස්තීන දේශය බලහත්කාරයෙන් කොල්ලකාගෙන සිටින කුඩා දරුවන් ද ඇතුළුව පලස්තීන වැසියන් නිතිපතා සමූල ඝාතනය කරන ඊශ්‍රායලයේ අගමැති බෙන්ජමින් නෙටන්යාහුව මුණ ගැහෙන්නය. මොළේ කළඳක් හෝ තිබේ නම් මහින්දට දුන් තාරකාවට තව තාරකා දහස් ගණනක් අබ්බාස් ජනාධිපති වරයාට එකවර පෙනී යා යුතුය. මෙවැනි වැඩක් කළ හැකි ලොවෙහි සිටින එකම නායකයෙක් සිටී නම් ඒ මහින්ද රාජපක්ෂ බැව් ඔහු නොදන්නවා විය හැක. තමන්ගේ ම ආණුඩුවේ අගමැතිට අනුන් ලව්වා කෙළවීමේ ගුණමකු කමට වඩා එය ද දෙවැනි නොවේ.

මහමුද් අබ්බාස් සිටින්නේ දශක කිහිපයකට පසු ව නින්දෙන් නැගිට්ට ගමන්ය. ඔහුට තවමත් මතක 1970 පාර්ලිමේන්තුවේ දී මහින්ද රාජපක්ෂ ලාබලම මන්ත්‍රීවරයා වශයෙන් පලස්තීන අරගලයට සහයෝගය දක්වමින් කළ කතාවය. එසේත් නැත්නම් පලස්තීනයට සහයෝගය පිණිස ඊශ්‍රායලය සමඟ තානාපතිකම් වර්ජනය කරමින් සිටි සිරිමාවෝ බණ්ඩාරනායකගේ සමඟි පෙරමුණු ආණ්ඩුවය. වර්තමාන මහින්ද රාජපක්ෂ ආණ්ඩුව යනු ඇමෙරිකාවේ, බ්‍රිතාන්‍යයේ හා ඉන්දියාවේ සහයෝගය ඇතිව බර අවි/රසායිනික අවි යොදා තම රටෙහි සුළු ජාතීන්ක පුරවැසියන් ව ආමානුෂික ලෙස සමුල ඝාතනය කළ වර්ගසංහාරය කළ පාලකයෙක් බව අබ්බාස් නොදනී. තමන්ව ඊශ්‍රායලයේ පීඩාවට පත්ව සිටිනවා හා සමානව මහින්ද රාජපක්ෂ ආණ්ඩුව ඊලාම් දෙමළ ජනතාව පීඩාවට පත් කරගෙන සිටින ධනේශ්වර පාලකයෙක් බව අබ්බාස් නොදනී. තමන්ට ඊශ්‍රායලය විසින් දිනපතා උඩින් යටින් පුහාර එල්ලකරන ආයුධ වලින්ම මහින්ද රාජපක්ෂ ආණ්ඩුව ඊලාම් දෙමළ ජනතාවට කෙළිය බව අබ්බාස් නොදනී. පලස්තීනයට එරෙහිව ඊශ්‍රායලයට ඇමෙරිකාව හා බ්‍රිතාන්‍යය ඇතුළු බටහිර රටවල් සහය දෙනවා ලෙසම ඊලාම් දෙමළ ජනතාවට එරෙහිව ඇමෙරිකාව හා බ්‍රිතාන්‍යය පූර්ණ සහයොගය දුන් බැව් අබ්බාස් නො දනී. පල්සතීනයේ ඉහළම තාරකා සම්මානයට අමතරව ලංකාවේ වරාය, ගුවන් තොටුපල, පාසාල්, ක්‍රීඩාංගන, උද්‍යාන, වැසිකිළි, කැසිකිළි සියල්ලටම තම නාමය යොදා මදිවී සිටින මහින්ද රාජපක්ෂ ට පලස්තීනයේ මාවතක් ඔහුගේ නමින් නම් කර උපහාර දක්වන ලද්දේ එබැවිනි.

2012 වසරේ පමණක් ඊශ්‍රායලය නිරායුධ පලස්තීන වැසියන් 250කට අධික සංඛ්‍යාවක් මරා දමන ලදි. සිය දහස් ගණනක් අත් අඩංගුවට ගන්නා ලදි. වසරක් පාසාම මරා දමන කුඩා දරුවන්ගේ සංඛ්‍යාව අති විශාලය. පලස්තීනය තුළ ඊශ්‍රායල බලහත්කාරයෙන් සිදුකරන ජනපදකරනය සීග්‍රයෙන් වැඩිවෙමින් පවතී. තමන්ගේ භූමියේ බීමට ඇති වතුර පොද ඉල්ලා පවා අරගල කිරීමට පලස්තීන වැසියන්ට සිදුව ඇත. ඇමෙරිකාවේ හා බ්‍රිතාන්‍යයේ සහයෝගය ඇතිව ලොව බලගතුම හමුදාව ගොඩනඟා අරාබි කළාපය ඇතුලත සිය බලය පතුරවාගෙන පලස්තීනය පාගා ලෙන සිටින ඊශ්‍රායලය සිදුකරන්නේ ධනේශවරයේ මුර බල්ලාගේ කාර්‍යයයි.

එමෙන්ම මහින්ද රාජපක්ෂ ආණ්ඩුවේ වර්ගසංහාරක යුද්ධයට සහාය පිණිස කෆිර් ප්‍රහාරක යානා හා ඩ්‍රෝන් වර්ගයේ යානා ඇතුළුව සියළුම බර අවි පසුගිය දශක කිහිපය පුරාම ඊශ්‍රායලය ශ්‍රී ලංකාවට ලබා දෙන ලදි. මීට අමතරව උපායමාර්ගික යුදමය උපදේශන සේවා ද විශේෂ කාර්‍ය බලකාය වෙනුවෙන් වාර්ෂික යුද පුහුණුව ද ශ්‍රී ලංකාවට ලබා දුන්නේ ඊශ්‍රායලයයි. නැගෙනහිර පළාත ඇතුළත බහුතර දෙමළ ජනාවාස වට කර ආරක්ෂාව සඳහා යැයි ආයුධ වලින් සන්නද්ධ සිංහල ජනාවාස පමණක් ඇති කිරීම සඳහා අසූව දශකයේදී ලංකාවට උපදෙස් ලබා දුන්නේ ද ඊශ්‍රායලය යන්න ප්‍රසිද්ධ කාරණාවකි.

ඊශ්‍රායලය වෙනුවට ලංකාව ආදේශ වන්නේ නම් පලස්තීනය වෙනුවට ඊලාම් දෙමළ ජනයා ආදේශවන්නේ නම් එහි ඇති සමානකම් හඳුනා ගැනීමට වැඩි උත්සාහයක් යෙදවීම අවශ්‍ය නොවේ. පලස්තීන ජාතීන්ගේ පීඩාව වඩාත් සමාන වන්නේ ස්වයං නිර්ණය අයිතිය හෝ වෙනම රාජ්‍යයක් සඳහා සටන් වදින ඊලාම් දෙමළ ජනයා පත්ව ඇති පීඩාවටයි. මහින්ද රාජපක්ෂ ආණ්ඩුව  මිනීමරු ඊශ්‍රායලය සමානව කටයුතු කරන විට හා පලස්තීන ජනාධිපති මහමුද් අබ්බාස් සිටිය යුතුව ඇත්තේ මහින්ද රාජපක්ෂ ආණ්ඩුව ට එරෙහිව ඊලාම් දෙමළ ජනයාගේ අරගලය පැත්තේ යන්න සිදුව යුත්තයි. එහෙත් අබ්බාස්ගේ නො දැනුවත් කමට හෝ දෙමළ අරගලයේ පාර්ශව කරුවන් විසින් පලස්තීනය වැනි රටවල් දැනුවත් නොකිරීමේ හේතුව ට සිදුවීම් සිද්ධ වන්නේ ප්‍රතිවිරුද්ධ ලෙසය. විලි ලැජ්ජාවක් ඇත්නම් ‘පලස්තීන අරගලයට සහාය දැක්වීම‘ අගයා අබ්බාස් ලබා දුන් තාරකා සම්මානය අතැතිව යමෙකුට නෙටන්යාහුගේ ඊශ්‍රායලයට පා තැබිය නොහැකි වුවත් සිද්ධ වන්නේ ද එයමය.

වාසනාවකට පලස්තීනය නිදහස් කරගැනීමේ සැබෑ අරගලය පලස්තීන ආණ්ඩුව හා බද්ධ නොවී වෙනම තලයක ජාතික හා ජාත්‍යන්තර වශයෙන් ප්‍රබලව පවතී. ඔවුහු ශ්‍රී ලංකා ආණ්ඩුවේ ෆැසිස්ට් ස්වභාවය ද ඊලාම් දෙමළ ජනයාගේ අරගලයේ අවශ්‍යතාවය ද හොඳින් හඳුනති.

4 comments:

  1. උබ වගෙ ගොන් තඩියෙක්. ඊශ්‍රායල් කාරයො කියන්නෙ පලස්තීන බූමියට පස්සෙ ඇවිත් අලුතෙන් රටක් හදාගෙන පලස්තීන කාරයො එලවපු ජාතියක්. අපෙ ඊලාම් කාරයො උත්සහ කරත් ඒකම තමා. වාසනාවකට ඊලාම කාරයො ඊශ්‍රායල් කාරයො තරම් දියුනු නෑ සහ උබලා වගෙ ගොන් වාමාන්ශිකයොන්ගෙ පච අපිට තෙරුම් ගන්න පුලුවන් උන නිසා අපිට ඊලාම් කාරයො පරද්දන්න පුලුවන් උනා. නැත්නම් අපිටත් වෙන්නෙ පලස්තීන ජනතාවට වගෙ නන්නත්තාර වෙලා ඉන්න.

    ReplyDelete
    Replies
    1. ඊශ්‍රායල්කාරයින්ව දෙමෙල්ලුන්ට සමාන කරන උඹනම් හරක් පැටියෙක්. උඹගේ වාසගම නානායක්කාරද වීරවංසද.

      Delete
  2. මේ විලිලජ්ජා නැතිකමද,තක්කඩිකමද නැතිනම් මෝඩ කමද?මේ ලංකාවේ විදේශ ප්‍රතිපත්තියද?පුරවැසියෙකු ලෙස මට දැනෙන ලැජ්ජාව වත් නොදැනෙන ප්‍රධාන පුරවැසියා ගැන කනගාටුවෙමු.

    ReplyDelete
  3. දෙමල මිනිස්සුන් ගෙ ප්‍රශ්නය එහෙම්මම පලස්තීන ජාතිකයින්ගෙ ප්‍රශ්නය වෙන්නේ නැති බව දේශපාලනය ගැන පුංචි දැනුමක්වත් තියෙන එවුන් දන්නවා. සමානකම් තියෙන්නෙ ප්‍රශ්න විසින් ඉතිරි කරල තියෙන දේවල් උඩ. දෙමල මිනිස්සු සිංහල මහ ජාතික ආන්ඩුවෙන් විඳින පීඩාව පලස්තීන ජාතිකයින් ඊශ්‍රායල් ආන්ඩුවෙන් විඳින පීඩාවට බොහෝ දුරට සමානයි. ප්‍රශ්නයේ සමාන අසමාන කම ගැන නොව මහජාතිය විසින් සුලු ජාතිය පීඩාවට පත් කිරීම මහ ජාතියේ එවුන් ඉවසන්නේ නැහැ. කිපෙනවා. එතන තියෙන්නෙ බලයේ ප්‍රමානයේ හැසිරීමයි. ජාතියක් පීඩාවට පත්වන විට එම පීඩනයට ජන වර්ගය, ජන සංයුතිය හෝ භූමියේ ප්‍රමානය වැදගත් නැහැ.

    ReplyDelete