A day without laughter is a day wasted - Charlie Chaplin

_______________________________________________________________________________________

ඔලුව පාත් කරං හිටු! සහෝදරත්වයෙනි


සුළුතරයක් වූ මුස්ලිම් ජනතාව රටෙන් එලියට ඇද දැමීම දක්වා වූ සිංහල මහ ජාතියේ අනේක විධ හිරිහැරයන්ට  පක් ව ඇති මේ මොහොතේ එයට විරෝධය පා ඔවුන් විසින් අද සඳුදා ඔවුනගේ කඩ සාප්පු වසා දැමීමේ හර්තාලයක් සංවිධානය කොට තිබේ. එහි වෙන්න නියමිත සාර්ථක අසාර්ථක  භාවයේ දිග පළල  අපි නොදනිමු. එහෙත් මෙය ලියන්නට සිදුවූයේ දඹර අමිල-බද්දේගම සමිත යන ප්‍රගතිශීලී යැයි කියන දේශපාලන හිමිවරුන් විසින් හර්තාලයට සහභාගී නොවනු පිණිස ඉල්ලා ප්‍රකාශයට පත්කර ඇති නිවේදනය නිසාවෙනි.

පසුගිය මාස කිහිපයක් තිස්සේ පීඩාවට පත්ව ඇති මේ මුස්ලිම් වරුන් ද සිංහල අප සැවොම මෙන්ම මේ පොළොවෙහි ම ඉපැදුණු ලාංකික පුරවැසියෝ වෙති. වෙනසකට ඇත්තේ ඔවුනගේ ආගමෙහි හා බොහෝ විට භාෂාවෙහිය. සංස්කෘතිමය වශයෙන් ඔවුන් අරාබි සංස්කෘතියට වඩා නෑකම් කියන්නේ ලංකාවෙහි වූ මිශ්‍ර සංස්කෘතියකටය. මුස්ලිම් වරුන්ගේ මෙම මේ මානව හිමිකම් උල්ලංඝණය  ඔවුන් විසින්ම  බලයට පත් කරණ ලද රජය විසින් හා එම රාජ්‍ය අනුග්‍රහයෙන් මෙහෙය වන කල්ලි විසින්ම සිදු කරණ කල්හී නිතිය මඟින් හෝ වෙනත් බලවේගයක් මඟින් සාධාරණයක් නොවන්නේ නම් එයට විරෝධය පෑමේ අයිතිය ඔවුන් සතුය. විරෝධය පෑම සාර්ථක නොවන්නේ නම් එයට එරෙහිව සටන් වැදීමේ අයිතිය ද සිංහලයන්ට මෙන්ද ඔවුනට ද ඇත. එයට සිංහල මහ ජාතිය මොනම අයුරකින් හෝ එරෙහි වන්නේ නම් එම ක්‍රියාවලිය තුළ ඇත්තේ පැහැදිලිවම ප්‍රතිගාමී  බවකි.

ඔවුනගේ ම නිවේදනයට අනුව  “ජාතිවාදයෙන් කුරිරු හස්තයෙන් වසර 30ක් පුරා බැටකා අවසානයේ සාමයේ සිසිල අපට දැනෙන මේ මොහොතේ අපේ උදාර මවුබිම තුල ආගම්වාදයක් අවුළුවා විනාශ කිරීම“ යන්න තුළම ඇත්තේ “අනේ අපේ ආතල් නම් දැං කඩන්න එපා“ යැයි පවසන සිංහල මහ ජාතියේ සරල ඉල්ලීමයි.

සුළු ජාතියක් වූ දෙමළ ජාතීන්ගේ අරගලය උදෙසා මොවුන් තූළ වූයේ ද එ වැනිම ආකල්පයකි. පීඩාවට එරෙහිව විරෝධය දැක්වීමට හෝ සටන් වෑදීමට  සුළු ජාතීන්ට අයිතියක් නැත. ඒ අතරම මේ සුළු ජාතීන් ගේ සාධාරණ අයිතීන් වෙනුවෙන් හෝ ඔවුනගේ පීඩාවන්ට එරෙහිව  දකුණේ ප්‍රගිතිශිලීන් යැයි කියන කිසිම පුද්ගලයෙක්, මාධ්‍යවේදියෙක් හෝ දේශපාලන ව්‍යාපාරයක්  කතා කරන්නේ හෝ පාරට බහින්නේ ද නැත.  දකුණේ සිංහලයා තමන්ගේ දඩබල්ලන් තමන් විසින්ම බැඳ දමන්නේ නැතිව මොවුන්ගේ ඉල්ලීම වන්නේ  “ඕනෑ නම් දුවලා පණ බේරා ගනිං හැබැයි පස්ස හැරිල ගහන්න නං එපා. අපේ සාමෙ කැඩෙනවා“ වැන්නකි.

මෙම විරෝධතාව වහා ගිනි ඇවිලෙන සුළු බැව් අපි ද  දනිමු. එහෙත් මෙවැනි විරෝධතාවයට සහභාගී නොවන්න යැයි මුස්ලිම් වරුන්ගෙන් ඉල්ලීමක් කළ හැකි අයෙක් වෙතොත් වේ නම් ඒ සහෝදරාත්මකව මුස්ලීම් වරුන්ගේ අසාධාරනයට හා පීඩාවට එරෙහිව සටන් කළ, රාජ්‍ය අනුග්‍රහය සහිත පීඩකයන්ට එරෙහිව  ක්‍රියාශිලීව මැදිහත් වූ මහ සිංහල ජාතියේ පුද්ගලයෙකුට හෝ දේශපාලන ව්‍යාපාරයකට පමණි.  අවාසනාවකට  සුළු ජාතීන්ගේ අයිතීන් වෙනුවෙන් මැදිහත්වන එවැනි පුද්ගලයෙක් හො දේශපාලන ව්‍යපාරයක් මේ මොහෙතේ දකුණේ නැත. 

3 comments:

  1. ඔබගේ කතාව නිවැරදිය. ඒත් බද්දේගම සමිත හාමුදුරුවෝ ගැන ඔබ මෙතරම් දරුණු ලෙස විවේචනය කිරීම වැරදිය. උන්වහන්සේලා අඩු වශයෙන් මෙහිදී සාධාරණ යමක් කරන්නට උත්සාහ ගනිති.
    පීඩිතයන් නැගිටීම සාධාරණ බවත් ඔවුන් රැඩිකල් වීම ස්වාභාවික බවත් මේ අවස්ථාවේදී මුස්ලිම් ජනතාව මෙතරම් හෝ සාමකාමීව සිටිතැයි මමත් නොසිතූ බවත් වැඩිදුරටත් කියමි. එහෙත් සමාජයේ වැඩිහිටියකු වශයෙන් මා වුවත් කාටත් කියන්නේ කලබල කරන්න එපා කියා ය. පොඩ්ඩක් ඉවසපන්, අපි තව ටිකක් කතා කරල බලමු කියා මා කියන්නේ අවංකවම මිස පීඩිතයාගේ නැගිටීම මර්ධනය කරන්නට නොවේ. එහෙත්, මා වැරදි විය හැකිය. මේ මොහොතේ නැගිටීම අත්‍යවශ්‍ය විය හැකිය.
    අසාර්ථක මහජන නැගිටීම් ගණනාවක් මතකයේ ඇති මා දැනුත් කියන්නේ හර්තාලයට පෙර කළ යුතු දේ තවත් තිබෙන බවය.

    ReplyDelete
  2. අවාසනාවකට සුළු ජාතීන්ගේ අයිතීන් වෙනුවෙන් මැදිහත්වන එවැනි පුද්ගලයෙක් හො දේශපාලන ව්‍යපාරයක් මේ මොහෙතේ දකුණේ නැත.

    While agreeing with the content and all other points I disagree with the above line.
    Dear Loopholes, There are people and groups who are strongly against this discrimination. Amongst them are some academics, youth groups , some anonymous groups , web sites and individuals who are active in the internet as well in their environment, on the real grounds. Even a considerable number of public are against this extremism. They might be small in no.s. Yet, it's not reasonable to say that there is none. That is again an extreme statement. Hope you understand.

    ReplyDelete
  3. Thanks for the comment. We just want to emphasize that no active involvement in the south against the discrimination of the minorities. We know there are few individuals as you highlighted, but that’s limited to a handful. The Sinhala majority progressives should fight against any kind of racism for the minorities and build the trust among them. We don’t see that kind of movement or support from the south today. Anyway we have all the respect for these individuals who raise their voices against the racism by all means.

    ReplyDelete